7 жніўня, Мінск /Кар. БЕЛТА/. Больш як 105 тыс. першакласнікаў сядуць за парты беларускіх школ у новым навучальным годзе. Аб гэтым
у праекце БЕЛТА "Краіна гаворыць" паведаміла прарэктар па метадычнай рабоце дзяржаўнай установы адукацыі "Акадэмія адукацыі" Валянціна Гінчук.
"У новым навучальным годзе з 1-га па 11-ы класы ва ўстановах агульнай сярэдняй адукацыі будзе вучыцца 1 млн 72 тыс. вучняў. У тым ліку мы плануем, што за парты сядуць больш як 105 тыс. першакласнікаў. Лічбы амаль такія ж, як у мінулым годзе", - расказала Валянціна Гінчук.
Сярэдняя школа нумар 11 Брэста - адна з самых вялікіх устаноў агульнай сярэдняй адукацыі, у ёй з пачатку новага навучальнага года будуць вучыцца 3220 чалавек. "Першых класаў мы набіраем у гэтым годзе 9, у іх мы прымем 228 вучняў, - праінфармавала дырэктар установы Людміла Кудзей. - Хоць мы і перапоўненая школа, але мне лягчэй у параўнанні з іншымі калегамі, таму што школа новая, у нас сучасны харчаблок, абсталяванне, дзве абедзенныя залы на 350 і на 140 месцаў, гэта нас ратуе, шчыра кажучы. У нас самыя вялікія, як звычайна, 1-2-я класы і 5-я класы. У першы год, калі мы адкрыліся, у нас 5-х было 18 класаў, іх апошняй літарай была "У". Але мы дастойна выйшлі з усіх цяжкасцей, у новым навучальным годзе будзе гэтак жа".-0-