2 верасня, Мінск /Кар. БЕЛТА/. Рэктар Брэсцкага дзяржаўнага тэхнічнага ўніверсітэта Сяргей Каспяровіч у праекце БЕЛТА "Краіна гаворыць" на тэму падвядзення вынікаў уступнай кампаніі - 2024 расказаў, як у 2024 годзе на ЦТ і ЦЭ ўдалося павялічыць аб'ектыўнасць ацэнкі ведаў найбольш падрыхтаваных навучэнцаў.
"Мінулы год быў пераходным. Была пэўная крытыка падыходаў, якія былі рэалізаваны ў частцы заданняў. Укараняўся цэнтралізаваны экзамен як від выпускнога. У гэтым годзе пэўныя памылкі мінулага былі ўлічаны. У заданні ЦТ і ЦЭ былі вернуты заданні пятага ўзроўню складанасці. З'явілася большая аб'ектыўнасць ацэнкі ведаў найбольш падрыхтаваных вучняў", - расказаў Сяргей Каспяровіч.
Начальнік галоўнага ўпраўлення прафесійнай адукацыі Міністэрства адукацыі Сяргей Пішчоў падкрэсліў, што ўсе заданні на тэсціраванні грунтуюцца на школьным стандарце і няма ніякай розніцы, дзе вучыўся школьнік. "Тыя веды, якія юнакі і дзяўчаты атрымліваюць у школе, і правяраюцца на тэсціраванні. Таму розніцы, дзе менавіта вучыўся абітурыент, няма ніякай. 100 балаў атрымліваюць юнакі і дзяўчаты і з вясковых школ, і з гарадскіх школ. У такой сітуацыі ўсё залежыць ад старання і жадання вучня і яго настаўніка, які выкладае прадмет", - рэзюмаваў Сяргей Пішчоў.-0-
*Праект створаны за кошт сродкаў мэтавага збору на вытворчасць нацыянальнага кантэнту.
